Diese Website verwendet Cookies, damit wir dir die bestmögliche Benutzererfahrung bieten können. Cookie-Informationen werden in deinem Browser gespeichert und führen Funktionen aus, wie das Wiedererkennen von dir, wenn du auf unsere Website zurückkehrst, und hilft unserem Team zu verstehen, welche Abschnitte der Website für dich am interessantesten und nützlichsten sind.
Team K: La candidata ladina por le Consëi provinzial Ingeborg Dejaco
Sön la lista di candidac dl Team K sarál en ocajiun dles lites dl consëi provinzial, ai 22 de otober 2023, ince na candidata ladina. Sciöche co-manajadëssa dl’ aziënda de familia a so tëmp, maestra de scora engajada y competënta y nia inultima presidënta dla Uniun Maestri Ladins (UML) por bëgn 12 agn, á Ingeborg Dejaco desmostré da ester na porsona cun na gran vëia da fá y da concretisé idees y proiec. Maria Elisabeth Rieder y Paul Köllensperger, i pröms candidac de lista, é sodesfac de chësta candidatöra: ”Al é important por nos avëi candidac de düc i trëi grups linguistics sön nosta lista . Cun Ingeborg Dejaco unse implü na porsona che se dá dassënn da fá por mantigní le lingaz y la cultura ladina”.
Chi che conësc Ingeborg Dejaco sá che ara ne stá mai chita. Cun scerieté y bun umor se dára bele da tröc agn incá da fá por le proscim y por la coletivité, daidán tresfora chi che adora sostëgn. Ara pó ince mostré sö n gran engajamënt tl’aministraziun y politica locala: por bëgn diesc agn éra stada mëmbra dl Consëi de comun y dla comisciun dl fabriché, mo ince rapresentanta ladina dles ëres a livel provinzial. So cör bat por la scora y por l’istruziun, le ciamp olache ara se á dagnora batü por n insegnamënt adegué, profescional y al’ altëza di tëmps, n insegnamënt che tëgn imprömadedöt cunt dl bëgn di mituns y dles mitans. Süa manira daverta y dala bona löna stá ala basa de so insegnamënt che ara manajëia con profescionalité, pasciun y gran savëi. Ara á la capazité da toché la jënt cun sües idees nöies y da trasmëte le dër entusiasm por les realisé. Sciöche dozënta tla université da Porsenú, tla Facolté dles Sciënzes dla Formaziun, conëscera dër bun les desfides de nosc sistem scolastich. So credo: La scora mëss se mudé sce i orun ester arjigná por le dagní, ara mëss se adegué ai bojëgns atuai y ales ghiranzes de na sozieté che s’á mudé dër tröp ti ultims agn. I adorun na scora plurilinguala che svilupëia y valorisëia ince na bona creativité y che vá adincuntra ales perts stersces di mituns y dles mitans; na scora che colaborëia cun i geniturs, ince sce al é te chësc ciamp ciamó debojëgn de na gran sensibilisaziun y formaziun.
Ingeborg Dejaco á dé y dá dötaorela so contribut ince por le volontariat. Bele adora êra ativa sciöche musicontra tla Musiga da San Martin y tl Sorvisc ai Jogn Val Badia. Por dër tröc agn éra stada dirighënta dl cor “Pici Ciantadus d’Al Plan”, süa gran pasciun, y é dötaorela mëmbra d’onur dla “Lia Culturala Fanes”.
Ingeborg Dejaco candidëia deache ara é dla convinziun che an dess politicamënter se daorí a deplü strades y valorisé idees politiches desvalies, ince alternatives, deache rodunt na bona plularité de minunghes y convinziuns pó contribuí a mioré le sistem democratich. An mëss avëi le coraje da porté inant opiniuns personales, ince sce ares se destanziëia val’iade n pü’ da chëres convenzionales.
Tl 2018 á n gröm de litadus y litadësses dles valades ladines tut sö cun plajëi la proposta politica nöia dl fondadú dla lista Team K, Paul Köllensperger. 5 agn de politica reala y ogetiva, mo ince de oposiziun costrutiva y propositiva fej sëgn da basa por les lites provinziales ai 22 de otober 23 y pormët da ciaré inant cun crëta y da jí trus nüs tl dagní dl Südtirol.
Categoria: Data: 18/08/2023